Պահածոյացված բանջարեղենը բավականին մեծ պահանջարկ է վայելում, հատկապես ձմռան ամիսներին: Այնուամենայնիվ, պահածոյացված բանջարեղեն օգտագործելուց առաջ հարկավոր է աչքի տակ ունենալ դրա թե՛ օգտակար և թե՛ հնարավոր բացասական հատկությունները:
Ի՞նչ օգտակար հատկություններ են պահպանվում պահածոյացված բանջարեղենում
• Ամբողջությամբ պահպանվում են սպիտակուցները, ճարպերը, ածխաջրերը, հանքանյութերը, օրգանական յուղերը և ճարպաթթուները:
• Պահվում են մագնեզիումը և կալցիումը, քանի որ դրանք չեն վերանում բարձր ջերմաստիճանից: Մագնեզիումն ու կալցիումը անհրաժեշտ են օրգանիզմի և նյարդային համակարգի համար, կարևոր են նաև իմունային համակարգի և ոսկրերի ձևավորման համար:
• Երկաթը ևս պահպանվում է և կարևոր է հեմատոպոեզիայի համար, իսկ ցինկը՝ գեղեցկության և հիշողության համար:
• Բայց վերջերս կատարված ամենակարևոր հայտնագործությունը լիկոպենն է` մի նյութ, որով շատ հարուստ է լոլիկը և որը համարվում է հզոր հակաօքսիդիչ, որը պայքարում է ծերացման դեմ և քայքայում է քաղցկեղի բջիջները:
Ի՞նչ վնաս կարող է հասցնել առողջությանը պահածոյացված բանջարեղենը
• Աղի մեծ քանակությունը կարող է դառնալ բարձր ճնշման պատճառ: Բացի դրանից, այն նպաստում է հոդերում աղի կուտակմանը:
• Աղը և քացախը, որոնք միշտ առկա են պահածոյացված բանջարեղենում, նպաստում են լիպիդային նյութափոխանակության խախտմանը և ցելյուլիտի առաջացմանը:
• Քացախը վնասում է մարսողությանը, առաջացնում է լորձաթաղանթի գրգռում: Կարող է ստամոքսի գաստրիտի և նույնիսկ խոցի պատճառ դառնալ:
• Պահածոյացված բանջարեղենի մեծաքանակ օգտագործումը կարող է հանգեցնել ատամի էմալի քայքայման:
• Խոսելով պահածոյացված բանջարեղենի մասին՝ անհրաժեշտ է հիշատակել նաև բոտուլիզմը: Բոտուլիզմով վարակված մթերքը անհնար է արտաքին տեսքից տարբերել: Վարակված մթերքում թունավորումը տարածվում է անհավասար կերպով, և թունավորվում է այն մարդը, որը կերել է ախտածին մարմինը պարունակող բաժինը: